أشار رئيس التيار الوطني الحر النائب جبران باسيل إلى أن "التيار خلق من رحم الجيش، وهو معجون فيه شهادة ومقاومة ونضال... وطبعاً في اجماع بالانتشار على محبة الجيش اللبناني، ما في شي وما في حدا بيقدر يفصل التيار الوطني الحر عن الجيش اللبناني... نحنا ابناء الجيش اللبناني، ونحنا اولاد الجنرال عون، ولمّا بتقول "الجنرال"، بمين بتفكّر؟".

وأوضح انه "لمّا التيار الوطني الحر او انا انتقد قائد المؤسّسة او قائد الجيش، فأنا ما بكون عم انتقد المؤسسة او الجيش بل انتقد الشخص، وهيدا من محبّتنا للمؤسسة وللجيش، حتّى يتم توقيف الخطأ ومعالجته لمصلحة المؤسسة والجيش، منفصل الشخص والقائد عن المؤسسة والجيش حتّى اعمال الشخص ما تؤذي المؤسسة لتبقى بعيدة عن الأخطاء أو الفساد أو السياسة... وهيك منكون منحبّ فعلاً المؤسسة والجيش ومنحافظ عليهم بقول الحقيقة وبالتصحيح"

وشدد على انه "ما لازم التيار ينسى شو عملنا للانتشار وشو بعد مطلوب منا نعمل، لأن شو ما عملنا نحنا مقصرين مع ناس هجروا بلدهم غصب عنهم بسبب اجرام او اجحاف دولتهم بحقّهم، وبرغم هالشي بقيوا على محبّتهم لوطنهم، ولولاهم ولولا تحويلاتهم لما بقي لبنان واقف على رجليه".

وأضاف: "أنا زرت 158 بلد ومدينة بالعالم، والتقيت فيهم بالمنتشرين، وياما رحت على مطارح ما فيهم لا سفير ولا قنصل وقالوا لي استحلينا يزورنا شي مرّة موظف من الخارجية... عملت ساعات طيران حتى شوف 50 لبناني لمدة ساعتين او ثلاث ساعات ليحسّوا انو في حدا سائل عنهم! ومع هيك، لمّا بفكّر بالانتشار، بشعر بالذنب والنقص وما بفكّر بس بالبلدان يلّي زرتها، بفكر بالبلدان يلّي ما قدرت زورها وبقول كان لازم او بعده لازم".

ورأى أن "منظومة الفساد السياسي والمالي ارتكبت بحق المنتشرين جريمة كبيرة وتعرّضوا لنفس الخديعة التي روّج لها فريق المحتالين النصّابين ومع الانهيار تبخّرت الودائع بمعظمها".